ولی کوچوک پاشا (تورکیه نین ژاندارما کوماندان لارین دان) اوتن گونلرده آپا خبر آژانسینا دییب آمریکا اوندان ایسته میشدیکی گونئی آزربایجان اوچون دئولت قورسون و پاشانین بو ایستکه قارشی چیخماسی اونون حبسینه (ارگنه کون دوسیاسیندا )یول آچمیشدیر. پاشا بیرده سویله ییب آمریکالیلار بولگه نی قاریشدیرماقدان اوتورو بونو ایسته ییب لر یوخسا گونئی لیلره جانلاری یانماییب. پاشا بیرده دییب او توران چیدی و بله حساب ائدیر کی 300 میلیون تورک بیرلشسه دونیانین جغرافیاسی دییشه جک دیر.
میللی سیته لریمیز بو خبری هئچ بیر شرحه احتیاج دویمادان عکس اتدیریب لر ، ها بئله ایران ایطیلاعاتنین اورگانی آذری ها دا بو خبره گنیش یر وره رک اونو عکس اتدیریب .
آنجاق منجه بو دانیشیق و اظهارات چوخ گنیش چاپ دا موذاکیره یه قویولمالیدی . بو ایدعا هاردان گلیب اورتایا چیخیر و اساسی نه دیر؟ میللی حرکت و تشکیلات لاریمیز بونا نه موناسیب گوسته ریب اونو نجه شرح اتمه لیدیلر ؟ بو ایدعا نه قدیر گرچک دیر ؟
من بوردا شخصی تجربه لریم دن ایستیفاده ائدره ک و خصوصن سون اوچ سنه ده خاریش ده یاشادیقیم زامانین و موشاهیده اتدیک لریم دن یولا چیخاراق بو مسئلیه اوز جوابیمی ورمیه چالیشاجاقام .
من بیر چوخ میللی فعال کیمی چشیت لی دلیل لردن دولایی وطنی ترک اتمه مجبوریتین ده قالیب وییرمی بش آی تورکیه ده قالدیق دان سونرا نهایت آمریکایا گلدیم . من بیر چوخ میللی فعال کیمین تورکیه یه بویوک بیر ماراق و سئوگی ایله گدیب بام باشقا دویقولارلا چیخدیم . تورکیه نین اجتماعییاتی تام تلوزیون لارین تبلیقاتینین عکسینه آتا ارکین و چوخ محافیظه کار بیر توپلوم دور. اسلام چیلیق و سننی حنفی مفکوره ایجتمانین هر بیر گوشه سین ده حاکیم دیر. اینسان لار عینی حالدا پاترون لارین ایستیلا و حاکمیتی آلتین دا دیلار. عثماننی ایدئولوژیسی تام گوجو ایله ایجتماع دا حوکوم سورور. چوخ اوزون زامان لاردان بری تورکیه ده هئچ بیر اینقیلاب گورونمه ییب آمما قارقاشا هر زامان اولوب دور. عثمانلی حاکمیتی و اونون بوگونکو وارثی دوشمانلاردان چوخ تورک لری اولدوروب منکوب اتمیشلرو عصیرلر بویو صفوی لر ، افشارلا و حتی قاجارلارا سالدیران دئولت چوخ ساییدا علوی ، قیزیلباش تورک لری و اوز خالقینی سوی قیریملارا معروض قویموش دور. بو اوزدن گچمیشی تطهیر اتمه ک اوچون هر زامان آزربایجان و قیزیلباش لار علیهینه تبلیقات گئدیب و 600 ایل سیاسی رسمی توتوم اینسانلارین بیلینجینه گیرمیش دیر.
دیگر طرف دن بو توپراق لاردان گئدن قانلی ساواش لار سلجوقلو لارین حاکمیتی و اوندان سونرا عثمانلی دئولتی و داها سونرا جمهوریتین قورولوشو و قانلی ساواش لار قرب دن و مسیحی دئولت لردن بیر شیطان رسیمیی میلتین و دئولتین اینانج و بیلینجینه یرلشدیرمیش دیر.
من تورکیه ده یاشادیقیم زامان اویرندیم کی بو باخیش بوتون سیاسی گروپ لار و حتی دینی و مذهبی قوروپ لاردا عاینی دیر. هم کمونیست لر هم طریقت چیلر و هم ظاهیرده آیدین لار عاینی دوشونورلر. قرب و اونون باشچیسی آمریکا دوشماندیر و چالیشیر نه اولورسا اولسون تورکیه نی بولسون ، میندار علوی لر و عجم لر (آزربایجان لیلار) دا ایستیرلر اوزلرینه دئولت قورسون لار و اونلارین دئولت قورمالاری کوردلری تشویق ائده جک تورکیه نی بولسونلر. بو بوتون او ایدئولوژی و باخیش آچیسیدیر دیرکی تورکیه ده اگمه ن دیر و تورکیه نین توتومون قرب و گونئی آزربایجانا تشکیل ائدیر.
ایکی سنه دن آرتیق تورکیه ده یاشامیم دا گوردویوم بون دان عیبارت دیر : تورکیه دئولتینین ، اپوزوسیون و NGO لارینین هئچ بیر یاردیمین میللی حرکت و میللی فعال لارا یوخ دور، من گورمه دیم و اشیتمه دیم . آنجاق موختلیف قوروم لار و شخص لر طرفین دن میللی فعال لارین ایچینه گریب و بیر نچه سینی اوز خیدمت لرینه گچیرمه لرین گورموشه م . زیرا بو وسیله ایله حرکتی کونترول اتمه لرین ، یونله ندیرمه لرین و اوز ایستیفاده لرین ساغلاماقین دوشونورلر و بو بیر گرچک دیر. قوزی آزربایجان حاکمیتی ده اشاقی یوخاری بو وسیله لردن ایستیفاده ائدیب عاینی شیوه لریله چالیشیر . بو گون تاسف له بیر نچه نفره کوچوک آیلیقلار وره رک تشکیلات لاری کونترول ائدیب و هر بیر یازی و توتومو قوزیین حاکمیتینه قارشی تحمل اله میر. (بو قونو بوردا قالسین سونرا ... دانیشاریق )
بو گون ده ولی کوچوک عاینی دوشونجه و عاینی شیوه ایله آپا نین میکروفونو ن اونونه گچیب بو سفر عاینی سوزلری پرده سیز ایفا ائدیر. سوران دا یوخدور پاشام سن 300 میلیون تورکو گونئی آزربایجان سیز نجه بیرلشدیرمه ک ایسته ییر سن ؟ قاراباغین آزادلیقی گونئین ایسارتیله می گرچک لشه جک دیر ؟! یوخسا گونئی ده دئولت قورولورسا دونیانین جغرافیاسی دییشیله جک دیر ؟! اساساً تورکیه و قوزئی حاکمیتی ایران دان چوخ چکیلیر یوخسا گونئین کندی آیاقی اوستون ده دورماسی بیر چوخ ایقتیداری سارسیب یرله یکسان اتمه سی سیزی قورخودور ؟
بو اظهارات منجه میللی حرکت ، میللی فعال لار و خالقیمیزا چوخ آیدین نوکته لری سرگیلیر ، میللی حرکت خاریجی ایلیشگیلرین بیر داها گوزدن گچیرمه لیدیر ، میللی ماراخ لاریمیز هاردا ایسه اوردا دورماقیمیزی گوسته ریر و بیزه آچیق آیدین دییر کی سیز تکجه اوز آیاقینیز اوستون ده دورون و ایچینیزه سیزان ضعیف ، آییاش و چیخارجیلاری تصفیه ائدین ، یوخسا بونلار حرکتی ییب تشکیلات لاری بونون اونون کوکلاسی ادئده جک لر!!!
تایماز اورمولو
واشینقتون - 2014
