بو آرادا سعید متین پور ، اسماعیل برزگری ، دکتر اسدالله اسدی چوخلو ضرر گوروب عاینی حالدا درمان اولمادان تک نفرلیک حجره لره سالینیب لار. اونلاردا اعتراض اوچون آجلیق آکسیاسینا باشلاییب لار. یوروش مهرعلی بیلی و بهنام شیخی ده بو آجلیق آکسیاسینا قاتیلیب دیر.
میللی فعال لار بو آشیکار عدالت سیزلیگی گوره رک آجلیق آکسیاسینا باشلاییب لار. بو چاغری کامپانیایا دونوشوب و ایندیلیک ده 70 آکتیویسته یاخین بو آکسایایا قاتیلیب لار . آکتویست لر اولکه نین ایچیندن و دیشیندا چشیت لی اولکه لردن بو سسه سس وریب لر. من ده ایکی گوندور بو آکسیایا قاتیلمیشام اوچ گون یمه ییب کونوللو اولاراق آجلیقا سلام وریرم .
دیرلی بیر دوستوم فیس بوک صایفاسیندا بله یازیر : " سياسي محبوسلاريميزدان حيمايه ائتمك واونلارين سسي اولماق چوخ گؤزه ل دير آنجاق منجه ائوده اوتوروب آجليق آكسياسي گئچيرمك يئرسيز بير ايشديروسانميرام كي تاثيرلي بير ايش اولا هر بير اعتراضي حركت گره كدير اؤزونو ايچري اينسانلارينا ودونيا جامعه سينه گؤسترسين وگره كدير گؤز اونونده اولسون . "
بو یازینی عزیز دوستوما جواب یوخ بلکه بیر دردی دیل کینی یازیرام :
دیرلی دوستوم من ده سیزینله راضیام. کشکی ایران ائلچیلیک لری قاباغیندا بو آکسیالاری گچیرسه یدیک ، کشکی بیزیم ده فارس لار کیمین گوجلو مدیا لاریمیز اولایدی . کشکی تداروک لریمیز اولسایدی ، سیاست چیلری اکسیالاریمیزا چاغیرسایدیق کشکی کشکی و کشکی . آمما بونلار یوخوموزدور . بونو سن ده بیلیسن من ده بیلیرم .
کشکی بو آکسیامیزی خاریجی لرین گوزونون اونون ده یاپسایدیق هرکس بیزه باخسایدی بیزی قونوشسایدی . آمما عزیز دوست بیز خاریجلیلردن چوخ هم وطن لریمیزه احتیاجیمیز وار. اینان بیز او قدیر بیر بیریمیزدن بیگانه ییک کی خاریجه لی بیزه قوهوم ساییلیر . او قدیر توپراق لاریمیز کیمین پارچالانمیشیق ، او قدیر بیر بیریمیزین اطرافینا دوشمانلیق دووارلارین هورموشوق کی دوشمانا احتیاجیمیز یوخ دور.
باخ اله بو آکسیادا شیرکت ائدن لر بیر بیرلری آرییب بولماییرلار . بیرینین فتوراقی گئدیر اوبورون کی گتمیر. بیرینین آدی دییلیر اوبیرینین کی دییلمیر.
بو آکسیا سنچه ندن اوتوردور ؟
منجه بو آکسیا خالقین ایچینه میللی محبوس لاریمیزین مظلوم لوقون آپارماق دان اوتورودور. باخ هر کس آجلیق اوروجو توتور ایش یرین ده ، مدرسه ده ، اونیورسیته ده و هر هانگی بیر یرده واردیر زیندانی لریمیزین سسین آپاریر. هم وطن لریمیزه ده بو سسین عکس صداسی اولماق دوشر. بو آکسیا یونیورسیته لریمیزه چکیلسه اویرنجی لر یمه ک لرین آلیب یمه دن ماسالار اوسته بیراخسالار سن باخ نه های دوشه جک . ایشچیلریمیز عاینی ایشی گورسه لر باخ نه اولار؟ آمما بونلار هاممیسی سنین ،منیم ،خالقیمیزین دویارلیقیلا اولار.
آمما اولماسا نه اولار ؟ منجه هئج اولماسا ویجدانیمیز راحاتلار. اینان منیم الیم دن بیر ایش گلمه دیینه گوره ویجدانیم گوینویور، الوولانیرام ، یانیرام . بو آکسیا منیم ویجدان آغریما ایی گلیب هئچ اولماسا الیم دن گلنی ائلیره م . اینان آجلیقا سلام منیم ویجدانیمی بیر آز اولسون راحاتلادیر . هئج اولماسا اوشاق لاریمیزا دیه ریک الیمیزدن بو گلیردی اونودا یاپدیق !
تانری یاردیمجیمیز اولسون .
تانری یاردیمجیمیز اولسون .
