هر گون خبرلرده بو و او تاریخی ائو ، بینا و عابیده نین یوخ اولوب ییخیلماسین اوخویوب کده رله نیرم . بیرگون آرپاچایی اوستون دن بیر کورپونو ییخیب محو ائدیللر .اوبور گون رحیمی افشار ائوی اورمودا محو اولوب تاریخین قارانلیقینا قاووشور. قره صاندیق قبیرصاندیقی تاراج اولوب گتدی . شیخ علی خان حامامی اورمودا ، سرداران خیاوانی اولدو . اطراف دا اولان بوتون قالالار تخریب آشاماسیندا و کیمسه صاحاب چیخمیر.
ارک قالاسین رضا شاه ییخدی ، بدن دووارلارینا ممد ریضا صاحاب اولمادی . ایندی ایسه بو حکومت ده ایت ییه سین تانمیر بیرگون اهالیدن بیری چیخیر قهرمانلو قالاسین ییخیر او بیری ده اوزبک قالاسین محوائدیر. خبر گلدی ساراجیق قالاسیدا ییخیلیب . ساراجیق قالاسی اورمونون 5 کیلومترلیقینده سویوق بولاق یولو اوسته و اوروم آدا کارخاناسینین قارشیسیندا بنا اولموشدو. بو تاریخی عابیده یرین توی سالونونیلا دییشیب . قافیل جماعت گتسینلر آتا بابالاربنبن سوموک لری اوستون ده "شبنم گل نار" هاواسیلا اوینا سینلار. تاریخ و هویت لرینین مزاری اوستون ده ائیله نسینلر، صاباح دا الی قانلی تروریست لر گلیب بو دویارسیز قافیل لری آولییب توپراقلارین دان دیشاری آتسینلار. تاریخینه ، هویتینه صاحاب دورمایان میلت محو اولمالیدی و گلجک بیزلرین سایه سینده قارانلیقدیر. آزربایجان اهالیسی دویارلی اولمایینجا ، تاریخ و طبیعتینه صاحاب چیخمایینجا محو اولوب هویت سیز یاشاماقا محکوم اولاجاقدیر . بیز بوردا قوربت ده یاشییاق ، سیزده اوردا ایسارت ده یاشایین!دمه ک هر میلت لاییق اولدوقو و ایسته دیی کیمین یاشییاجاق دیر.
توضیح:فوتوشکیل قهرمانلو قالاسینا عاییددیر.
