تانرینین آدیلا
گون آیدین منیم گؤزل قیزیم سئلـــــین! چوخ زاماندیر ائوه گله بیلمیرم. کیچیک قیزیمی، منیم بالاجا سئلین بالامی باغریما باسیب، قوجاغیما آلا بیلمیرم.
آتالیق دویغولاریمی سنینله پایلاشانمیرام. آمما، اوزاق اولسام دا سنی چوخ اؤزلهمیشم. او واختلار کی منه تیلفون آچماق نؤبتی یئتیشیر، ائوه تیلفون آچیب، سنینله دانیشا بیلیرم. سن منه دئییرسن "تئز اول! ائوه دؤن آتا!". من ده سنه دئییرم "قیزیم! ایشدهیم! ایشلهریمی قورتاریب، گلهجهیم!" آما، داها بسدی! سنین آتان داها قیزینا یالان دئمک ایستهمیر. من بوراجان سنه یالان دئمیشم، باغیشلا منی. من ایشده یوخ، بلکه دوستاقدایام! بیلیرم
کی دوستاغین آنلامین بیلمیرسن. دؤز سنه دوستاغین نه جور بیر یئر اولدوغونو آچیقلاییم. قیزیم! دوستاق بیر یئردی کی دووارلاری چوخ اوجا و قالیندیر. اورادان هئچ بیر کسین حاققی یوخدور بیر آیری یئره ایجازهسیز چیخسین. قوی بیر آیری جور دئییم! شاید بوجور دوشونهسن. آخی سنین هله اوچ یاشین دولماییب قیزیم! ائودهکی سئوگی قوشوموز یادیندادیرمی؟! اونون قفسی نئجه؟! یادیندادیر بیر گون منه دئدین "آتا! قوی قوشوموز اوچسون." من ده اونو اوچوردوم. بیز ده سئوینیب گؤلدوک. ایندی بو منی ساخلایان دوستاق همن قفسدیر، او قوش دا بورادا اولان توتساقلانان-قفسلهنن اینسانلاردیر.
حتماً سوروشورسان کی "سن مگر قوشسان کی سنی قفسه سالیبلار؟". یوخ قیزیم! من سادهجه بیر یوردونو سئون بیریسییم. من یوردوموزون گؤزل گؤلونو سئون بیر اینسانام. من ده باشقا وطنسئور اینسانلارا تای بیر وطنسئور اینسانام. بیز وطنسئور اینسانلار اورمو گؤلونون قورویوب، دوزلاق چؤلونه چئوریلمهسیندن نیگران و ناراحاتیق. آمما، بیزیم اؤلکهده بو سئوگی بوتون باشقا سئوگیلر کیمی گوناهدیر، سوچدور! بیزیم سئوگیمیز بیر جورم تانینیر. ائله منی ده بونا گؤره گوناهلاندیریب، دوستاغا سالیبلار. بوردا منه تای اینسانلار وار کی منله بیرلیکده گوناهلاندیریلیب، و دوستاغا سالینیبلار. بونلارین هامیسی سنین عمیلریندیر. عمی ناغارا، عمی قارمان، و بیر چون آیری عمیلر!
آمما، قیزیم نیگران قالما! من تئزلیکله ائوه دؤنوب، گلهجهیم. منی گؤزله! بیر ده، منیم گؤزل قیزیم، آنان سنی چوخ سئویر. بیلیرسن کی یاخچی قیز-اوغلان آتا-آناسینین سؤزونه قولاق آسار، و دهیر وئرر. سن ده آناوین سؤزونه قولاق آس آی گؤزل قیزیم سئیلن.
اوزاقدان سنی باغریما باسیب، اؤپورم!
سنین آتان «آراز» (یاسر سلمانی رضایی)
25/08/1390
