۱۳۹۳ فروردین ۳, یکشنبه

سورگون ده گونئی آزربایجان پارلمانی

مارتین 15ده بیر سیرا میللی فعال  ،دانیمارکانین کوپنهاک شهرین ده توپلاناراق گونئی آزربایجان پارلمانینین تمه لین آتدیلار خبری بیر آن دا بوتون میللی فعال لار وحرکتیمیزین تعقیب چیلرین گونده مینه دوشدو.
 گوناز تی وی ده بیرینجی کز وریلن خبرده پارلمانین تشکیل اولونماسی اعلان اولدو کی نظره گلیر موناسیب کلمه اولماسین زیرا 35 میلیون لوق بیر اولوسون نماینده لری بو قدر آز و محدود طیف لردن تشکیل اولونماسی دوغرو دئیل.
بیرینجی اولاراق هر سوزدن اونجه بیان اتمه لیه م بو قرار منیم فیکریمجه یرینده و چوخ دوغرو بیر قراردیر. حتی بیز بو مجلیسی قورماق دا گئج قالمیشیق و گره ک داها اونجه بو ایشی گورردیک ، آنجاق بله بیر بویوک میسیونو عوهده لنمه ک و قاباقا آپاراماق ساغلام زمینده و گرچک طرح و برنامه ایله مومکون دور یوخسا وردیگی خسارت قورخارام کی الده اتدییمیزدن داها چوخ اولا بیله ر.
سورگون ده گونئی آزربایجان پارلمانین  تشکیل ائدن هیئت میللی حرکتین اونده گدن سیاسی قورولوشلار و تانینمیش اینسانلارینیین بیر تعدادین دان تشکیل اولوب و بعید گورورم بوندان اونجه کی تجربه لردن او جومله دن داک ، باب ، میللی شورا ، گونئی آزربایجان کنگره سی و گونئی آزربایجان کونسه یی نین تجربه لرین دن بی خبر اولالار زیرا اشاقی یوخاری بو تشکیلات لاردا عضو اولوب لار و یا چوخ یاخیندان ایلگیله نیب لر. آمما نظره گلیر گره که ن تجربه لر آلینماییب و یا شرایط ایجازه ورمه ییب کی دوغرو چرچوه ده ایش قاباقا گتسین . 
من معتقیدم کشکی دیه رلی دوسلاریمیز داها گنیش قابسام دا پروژه نی تعریف ائدیب داها چوخ طیف لر و تشکیلات لار دان ایستیفاده اتسه یدیلر. منه اله گلیر دوغرو دوروست دیالوق زمین لری تشکیلات لاریمیز آراسیندا یارانمایینجا هئج نوع بیرلیک هله پارلمان کیمین بویوک بیر میسیون یارانماز. بوگون جیدی مناقشه لر تشکیلات لار آراسیندا موجود دور. احمد بی اوبالی و تمثیل اتدیی تشکیلات جیدی صورت ده ایستیقلال پارتیاسی و عاریف کسگین و اونا یاخین طیف لر له مناقیشه لیدی. گاموح و چهرگانی بی بیر چوخ اینشعاب لارا شاهید اولوب لار و گاموح دان چیخان طیف لر هله اوز آرا لاریندا مشترک دیالوقا گچه بیلیب اختلاف لارین رسمیته تانییب مشترک زمین یارادماییب لار. آدی گچن پارلمان دا دیرنیش تشکیلاتی ، گادپ ، بیرلیک کیمین بیر قورولوش لارغاییب دیلرگرچه دعوت اولونوب لار . بعضی تشکیلات لار دان هئچ دعوت اولماییب . غاییب لر ساده جه تشکیلات لار منحصیر دئییل بویوک بئی رسول اوغلو ،ماشاللاه رزمی و سول طیفین دن  اوردا کیمسه یوخ دور. فئدرال چیلاردان مثلاً ضیا صدرالاشرافی دا یوخدور. میثال چکمه یه دوام اتمه ک ایسته میرم زیرا بو قونودا تارتیشمایا لزوم یوخدور ، هر حال دا آد گتیرمه ک دن منظوروم دقیق اولاراق مسئله نین اوستون آچماق دیریوخسا تارتیشمالالاری کورک له مه ک دئیل.
 بیر جومله ده سوزومو یکون لاشدیرماق ایسته سم دمه لیم آدی گچه ن طیف لر ، تشکیلات لار و فعال لار جیدی اولاراق تارتیشما ، دیالوق و موفاهیمه یه گچمه یینجه بیراخین پارلمانی بیر جیبهه بله قورولماز.
من دن سورولسایدی ، دیه ردیم اروپا دا اولان دوسلار ، آمریکا و کانادا دا اولان دوسلار ؛ تورکیه ده و قوزی آزربایجان دا اولان لار آیری آیری توپلانیب گرکسه بعضاً  حضوری گرکسه بعضاً قیر حضوری توپلانیب مشترک نوقطه لره گلمه لی دیلر. اختلاف لار آزالان دان سونرا و مشترک نوقطه لر چوخلاشدیق دان سونرا موختلیف کار گروه یا پلانلانما گروپ لاری تشکیل اولوب پارلمانین هانگی زمین ده ، نجه و نه شرایط ده قورولماسینا مشترک نظره یتیشدیک دن سونرا عضولرین هانگی شرایط لره حائیز اولدوقلارین و کیملر پارلمانا سچیله بیلرلر و بونون مکانیزماسی نئجه اولدوقو بللی اولدوق دان سونرا  و عمومی توپلانتیلار بیر نچه دفعه تشکیل اولدوق دان سونرا قطعی اولاراق اعلان اولونمالیدی . مدیایا وریله ن خبر و خبرین جومله لری بله دیقت له تنطیم اولماییب دیر و تاسف له ایشین جیدییه تین یانسیتماییر.
شخصاً بو هیئتیت بو میسیونو اوسته له نیب انجاما یتیرمه سین چوخ ایستیرم آنجاق قورخورام کی بو میسیونو یرینه چاتدیرا بیلمه سینلر. ایش اساساً چوخ گوزل و موقدس ایشدیر آنجاق ترتله سیک اولوب و دوغرو بیچیم ده ساغلام زمین ده اولوشمادیقینا گوره ایشین یرینه گتمه سیندن ، چوخ تاسف لا شوبهلیه م . 
آرتیرمالیام ایش لری سامانا یتیرمه ک اوچون چوخ دوشونوب موختلیف جنبه لر ی مثلا بو ایشین مالی قایناق تامینی  چوزول مه یینجه هر بیر تشبثی مدیالارا سورمه ک حرکته جیدی درجه ده ضربه ووروب و اولومسوموزاتگیله دیین دن امینم . بونون کیمی موهوم تشبث لر یرینه گتمه سه میللی حرکتی قاباغا آپاران عونصورلردن خالق سویویوب و اعتماد سیزلیق جوی تقویت اولار.
حرکتین لوبی چیلیک ضعف لرین درمان اتمه دن  بو بویدا بویوک ایشی بیر ایکی گون ده حل اتمه ک دوشونجه سین من شخصاً سیندیره بیلمیرم و قانع اولا بیلمیرم کی پارلمان کیمین بویوک بیر میسیون یرینه چاتا .
و ان سون نوقطه بودور کی  ، بو بویوک لوک ده ایشه سویونان بیر هیئت هر طرف لی دوشونمه لیدیر و بو هیئتین ایچینده هئچ بیر شائبه لی فرد اولمامالیدیر. تاسف لر اعضالارین بیری گونئی آزربایجان اویرنجی لرینین حاقلارینین تاپدالانماسی و اونلارین حاق لارین موختلیف سبب لر له فارس لارا وریلمه سیله و تورکیه ده کی اویرنجی لرین بورس لارینین کسیلمه سیله اتهام لانیر .شخصا دوشونورم اولوسوموزون طالعین تایین ائدن هر بیر قورولوش سون درجه تمیز ، انظباط لی ، دقیق و فداکار اولمالیدیر یوخسا ایش یرینه چاتمازو یا چاتسا بله اولوسوموزو بیر چالادان چیخاردیب بیر قویویا سالار.
ایسته رم کی بو تشبوثا جسارت ائدیب قایه گوسته رن عزیز لریمیز بو فیکره دوشمه سینلر کی من بو حرکته قارشی اولاراق بو سطوری یازیرام بلکه عکسینه توم صمیمیتیمله ایستیرم ضعف لری گوروب برطرف ائدیب و بو مقدس یولا دوام ائدک ، جهدیم بودور طرف توتمادان بیر ناظیرکیمین عاقلیما گله ن نوقطه لری بیان ائدم زیرا هرکس مسئول دور الینده اولدوقو قدر بو ایشین انجامینا یاردیم اتسین . 
تایماز اورمولو 22 مارت - واشینقتون