” قلمله، قيلينجين قازانديغي غلبه دن داها بؤيوک ظفرلره نايل اولماق اولار “
هاررييئت بيچئر ستووئ
ديندار بير عاييله ده آنادان اولدو. کيچيک ياشلاريندان اوجا آللاها داها اورکدن و صداقتله خيدمت ائتمک اوچون يوللار آختاردي: ” ياخشي بير اينسان اولوب عؤمرومون سونونا کيمي آللاها خيدمت ائده جگم “ سؤزلري حيات دئويزي اولدو و
بو يولدا اؤزونو شام کيمي اريتدي. آما، ساده جه، ياخشي اينسان اولماق بس ائتميردي، باشقالارينا دا نه ايسه ياخشيليق ائتمه لي ايدي. اونون ياشاديغي دؤورده آغلار زنجي لره قان قوسدوروردولار. بو حالدا اونلارين درديني قلمه آلمالي و بو يوللا کؤله ليگه قارشي اؤلکه ده نيفرت ياراتمالي دي. ائله ده ائتدي. چونکي يازماغي ياخشي باجاريردي. ” توم عمي نين داخماسي “ (1852) رومانيني يازاراق، بورادا زنجي لرين باشلارينا گتيريلنلري ائله اورک آغريسي ايله تصوير ائتدي کي، بو، نينکي آوروپادا، هم ده آمريکادا ميليونلارلا آدامين اونلارين حاقلاريني مودافيعه ائتمک اوچون آياغا قالخماسينا گتيريب چيخاردي. بو اثرين تاثيري ايله آمریکا بیرلشمیش اشتاتلاری نین هر يئرينده کؤله ليک سيستئمينه قارشي موباريزه باشلادي. آمریکا-دا و آوروپادا کؤله ليگه قارشي موباريزه نين باشلاماسي نين اساسيني قويان قهرمان قادين ايسه هاررييئت بيچئر ستووئ ايدي. آمريکاني ايکييه بؤلن کيتاب
آمریکا پرئزيدئنتي آبراهام لينکولن اونونلا اوز-اوزه گلديکده: ” دئمک، بو بؤيوک ساواشي باشلادان کيتابي يازان کيچيک قادين سيزسينيز ” ، – دئميشدي. لينکولنون هوسله اوخودوغو ” توم عمی نين داخماسي “ کيتابيندا کؤله ليک رئژيمي نين کسکين تنقيد ائديلمه سي و بو سيستئمين ساخلانماسي نين هم آغلار، هم ده قارالار اوچون لکه اولدوغو حسساس بير شکيلده تصوير ائديلميشدي. او دا واردي کي، لينکولنون ” کيچيک قيز “ دئيه موراجيعت ائتديگي بو بؤيوک يازيچي نين آدي چکيلن اثري درحال ساتيلميشدي و ناشيرلر مجبور اولاراق اونون تيراژيني آرتيراراق، 3 ميليون نوسخه چاپ ائتمه يه مجبور اولموشدولار. لاکين يئنه ده اوخوجولارين اونا اولان طلباتيني اؤده يه بيلمه ميشديلر. اثرين تاثيري آلتيندا آمریکانین شيماليندا کؤله ليگه قارشي موباريزه باشلاميشدي. بو ايسه کؤله ليگين ساخلانيلماسي نين قيزغين طرفداري اولان آمريکانين جنوبوندا اعتيراضلارلا قارشيلانيردي. نتيجه ده، بئله بير وضعيت آمریکانین جنوبو ايله شيمالي آراسيندا وطنداش موحاريبه سي نين باشلاماسينا گتيريب چيخاردي. بو موباريزه ده مينلرله اينسانين قاني آخيديلسا دا، سون نتيجه ده کؤله ليک علئيه داري شيمالين کؤله ليک طرفداري جنوب اوزرينده غلبه سي آمریکا-دا يئني، دئموکراتيک بير دؤورون تمليني قويدو. بونونلا دا هاررييئت بيچئر، اؤزونون ده دئديگي کيمي، قلمي ايله قيلينجين گؤره بيلمه ديگي بؤيوک بير ظفره ايمضا آتدي و آديني تاريخين آخاريني دييشن قادينلار سيراسينا يازديردي.
ديندار عاييله نين ديندار قيزي
هاررييئت بيچئر 1811-جي ايل، اييونون 14-ده آمئريکانين کوننئکتيکوت ايالتي نين ليتچفئلد (Litchfield) قصبه سينده ديندار بير عاييله ده آنادان اولموشدو. هاررييئتين آتاسي ليمان (Lyman) بيچئر کونقرئسين عوضوو ايدي. ليمان بيچئر تانينميش تئولوق و آمريکا اينجيل جمعيتي نين اساسيني قويانلاردان بيري حساب ائديليردي. او دا کؤله ليگه قارشي آچيق شکيلده موباريزه آپاريردي. هاررييئتين آناسي روکسانا فوت (Roxana Foote) دا ديندار بير قادين ايدي و اوشاقلاري نين قلبينه ايلاهي سئوگي و اينسانلارا خيدمت دويغولاري نين سالينماسيني دؤنه-دؤنه دوعا ائديردي. حاديثه لرين گئديشي گؤستردي کي، اونون بو دوعالاري قبول ائديليب. آما هاررييئت 4 ياشيندا اولاندا آناسي دونيادان کؤچدو. آتاسي بوندان سونرا يئنيدن ائولندي. آما روکسانانين اوشاقلاري هئچ واخت اؤگئي آنانين نظارتي و تاثيري آلتيندا اولماديلار. اونلار اوزرينده نظارت آتالاري نين الينده ايدي. هاررييئت ياخشي تحصيل آلا بيلدي. 8 ياشيندا ايکن آتاسي اونو ميسس ساراه پيئرجئ مکتبينه قويدو. 5 ايل بورادا اوخودوقدان سونرا 13 ياشيندا ايکن باجيسي يئکاتئرينا طرفيندن اساسي قويولان هارتفورد قيز آکادئميياسينا داخيل اولدو. او بورادا فرانسيز، ايتاليان و لاتين ديللريني اؤيرندي. همين دؤورده هاررييئت آتاسي نين تشکيل ائتديگي ديني بير مجليسده ايشتيراک ائتدي. بوندان سونرا بوتون حياتيني حضرتي عيسايا حصر ائتمگي قرارا آلدي. بو قرارلا دا او گله جک حياتي نين اساسيني قويدو.
يازماق، اره گئتمک و يئنه ده يازماق
1833-جو ايلده ” Vestern Monthly Magazine” آدلي بير درگيده ناغيل موسابيقه سي نين کئچيريلديگي باره ده ائلان اوخودو. اولجه دن ده سينه سينده يازماغا بؤيوک بير هوس دويان هاررييئت کيچيک بير ناغيل يازاراق موسابيقه يه گؤندردي. آما هئچ گؤزلمه ديگي حالدا موسابيقه ده بيرينجي يئري توتدو. 1834-جو ايلين آپرئل آييندا اونون بو ناغيلي ” Vestern Monthly Magazine” ده درج اولوندو. بو، هاررييئتي يازماغا داها دا هوسلنديردي. 1836-جي ايلده اؤزوندن 9 ياش بؤيوک اولان پروفئسسور، دين خاديمي، هم ده کؤله ليگه قارشي موباريزه آپاران کالوين استوو (Calvin Stove) ايله عاييله حياتي قوردو. بو ائوليليک هاررييئتين تانينميش يازار اولماسيني ايللرله لنگيتدي. بو ائوليليکدن اونلارين 7 اوشاقلاري اولدو. آما حياتلاري دايم ماددي سيخينتي ايچينده کئچدي و اوشاقلاريندان بيري کيچيک ايکن اؤلدو. بونا باخماياراق، اونلار بير-بيريلرينه داياق اولماغي و چتينليکلره سينه گرمگي باجارديلار. هاررييئت اري حاقيندا: ” اگر سن منيم چوخ سئوديگيم حيات يولداشيم اولماسايدين، سني يئنه ده سئورديم ” ، – دئميشدي. اونلارين گئجه-گوندوز چاليشمالارينا باخماياراق، عاييله نين ماددي دورومو آغير اولاراق قالماقدا داوام ائديردي. بونو گؤرن هاررييئت قلميني الينه آلدي و بو يوللا عاييله نين آغير ماددي دورومونون آرادان قالديريلماسي اوچون آز دا اولسا ارينه يارديم ائتمک فيکرينه دوشدو. بئله ليکله، هاررييئتين يازيلاري موختليف قزئت و ژورناللاردا درج اولونماغا باشلادي. يازيلاري درحال ديقتي جلب ائده رک، اونو مينلرله اوخوجونون سئويمليسينه چئويردي. آلديغي قونورارلارلا عاييله نين ماددي دورومونو ياخشيلاشديران هاررييئت داها ايري حجملي اثرلر يازماغا گيريشدي. بو ايشده اونون ان بؤيوک داياغي و ايلهام وئريجيسي يئنه ده اري ايدي.
آمريکاني سارسيدان کيتاب
1850-جي ايلده آمريکانين اهاليسي نين سايي 23 ميليون نفر ايدي. اونلارين آراسيندا 2،3 ميليون نفر کؤله زنجي ده واردي. هله 19-جو عصرين 30-جو ايللريندن آمئريکادا کؤله ليگه قارشي موباريزه باشلاميشدي. بو موباريزه نين طالعييني ايسه هاررييئتين يازديغي و بوتون آمريکاني سارسيداجاق ” توم عمي نين داخماسي “ کيتابي حل ائده جکدي. او، بو کيتابيندا گؤردوکلريني، شاهيدي اولدوقلاريني، کؤله صاحیبلري نين پولا احتيياجلاري اولاندا زنجي لري دوغمالاريندان آييراراق ساتديقلاريني و اونلارين باشلارينا گتيريلن دهشتلي ايشگنجه لري اورک آغريسي ايله قلمه آلميشدي. قئيد ائدک کي، ” توم عمي نين داخماسي “ اثري قلمه آلينان ايللرده آمریکا-دا آغاسيندان قاچان کؤله لر تعقيب ائديله رک اله کئچيريلير و اونلارا آمانسيز ايشگنجه لر وئريليردي. هاررييئت کؤله ليگي ايفشا ائدن و آمريکا و آوروپاني سيلکليه جک بو اثريني يازارکن کيچيک قيزي هله سود امر ايدي. اونا گؤره ده گوندوز ايشلريني قورتاريب گؤرندن و گئجه کؤرپه سيني ياتديراندان سونرا يوخوسوز گئجه لر کئچيره-کئچيره بو اثريني يازدي. 1851-جي ايلده او، يئني اثري نين ايلک بؤلومونو درج اولونماق اوچون واشينقتوندا نشر ائديلن و کؤله ليک علئيه داري اولان ” National Era” يا گؤندردي. اورادا اوچ آي عرضينده بو اثري نظردن کئچيرديلر و سوندا سئريال شکلينده درج ائتديلر. هاررييئت رومانيني کيتاب حاليندا چاپ ائتديرمک ايسته ييردي. هرچند کي، بو کيتابين اونا شؤهرت و يا علاوه قازانج گتيره جگينه اينانميردي. بوستونداکي ايري بير نشريات کؤله ليگه قارشي چيخان بو روماني درج ائتمه يه قورخدو. نشريات اؤلکه نين جنوبوندا نشر ائتديگي ديگر کيتابلاري نين ساتيشينا قاداغا قويولاجاغيندان احتياط ائده رک، هاررييئتين اثريني گئري قايتاردي. هاررييئت چوخ چتينليکله ده اولسا، يئنيجه فعاليته باشلايان بير نشرياتي اثري نين چاپ ائديلمه سي اوچون راضي سالا بيلدي.
کيتابين ساتيشي 3 ميليونو اؤتدو
يئني رومان ايلک ساتيشا چيخاريلديغي گون 3 مين عدد ساتيلدي. آما کيتابا ماراق بؤيوک ايدي. اونا گؤره تجيلي اولاراق اونو يئنيدن 300 مين عدد چاپ ائتمه لي اولدولار. آما بو دا بس ائتميردي و دونيانين هر يئريندن کيتاب اوچون سيفاريشلر گليردي. اونا گؤره ده گنج نشريات گئجه- گوندوز بو روماني چاپ ائتمکله مشغول اولوردو. آز سونرا کيتابين تيراژي 3 ميليونا چاتدي و اونلارين هاميسي ساتيلدي. کيتاب دونيانين 50-دن چوخ ديلينه ترجومه ائديلدي. آما کؤله ليک طرفدارلاري هاررييئتين يالان يازديغيني ايديعا ائديرديلر. بونو گؤرن هاررييئت عصبيلشه رک ” توم عمي نين داخماسي نين آچاري “ آدلي اثريني يازدي. او، بو کيتابيندا او دؤورده کؤله لرين معروض قالديقلاري ظولم باره ده و اونلارين حئيوان کيمي آلينيب-ساتيلماسي باره ده قزئتده وئريلن يازيلاري ثوبوت کيمي اورتايا قويدو. بو اثرين اونا بؤيوک شؤهرت گتيرمه سيندن روحلانان هاررييئت بيچئر 1856-جي ايلده ” Dred “ رومانيني يازدي. بو اثر ده تئزليکله ساتيلدي و مؤليفي نين شؤهرتيني داها دا آرتيردي.
” توم عمي “ کؤله ليگي سارسيتدي
بو اثردن سونرا آمريکادا کؤله ليگه قارشي يئني ساواش باشلادي.1854-جو ايلده کؤله ليگه قارشي موباريزه گئنيش ووسعت آلدي و اؤلکه ده يئني دئموکراتيک تمللره صاحیب اولاجاق رئسپوبليکاچيلار پارتيياسي ياراديلدي.1860-جي ايلده آبراهام لينکولنون باشچيليق ائتديگي بو پارتييا حاکيميته گلدي و کؤله ليگي قورويوب ساخلاماق ايسته ين جنوبا قارشي موحاريبه باشلادي. موحاريبه شيمالين غلبه سي ايله باشا چاتدي و کؤله ليک رسمن لغو ائديلدي. هاررييئت بو غلبه دن سونرا لينکولن ايله گؤروشدو. لينکولن: ” دئمک او بؤيوک ساواشي باشلادان کيتابي يازان کيچيک قادين سيزسينيز ” ، – دئيه رک اونونلا سالاملاشدي. وطنداش موحاريبه سي باشا چاتاندان سونرا هاررييئت عاييله سي ايله بيرليکده بير مودت فلوريدادا ياشادي. او بورادا قادينلارين حوقوقلاريني مودافيعه ائدن آداملارين آراسينا قاتيلدي. هاررييئت ” Heart and Home” آدلي درگيده قادينلارين حاقلاريني مودافيعه ائدن يازيلار يازدي. فلوريدادان گئرييه هارتفوردا دؤنن هاررييئت بورادا ” موقدس تاريخين قاديني “ ( ” Voman in Sacred History ” ) آدلي اثريني يازدي. کؤله ليگين لغو ائديلمه سينده بؤيوک امگي اولان و قلمي ايله بؤيوک بير اوردونون گؤره بيلمه ديگي ايشي گؤرن هاررييئت بيچئر 1896-جي ايلده 85 ياشيندا وفات ائتدي.
کؤچورن: آیدا بیات
اؤزگور قادین